Ni sa bula vinaka na lewe ni noda Tabacakacaka ko Navuloa. Au sa kidavaki keda tiko ena Yaca ni Kalou na Tamada kei na Luvena kei na Yalo Tabu. Sa cabeta ko Navuloa nai ka 26 ni yabaki ni nona vakaitalatala, kau sa kenai ka vitu ni Talatala.

E ulutaga raraba tiko ni nodai lakolako voli mai sai koya. Na noda veivakaukauwataki ki na veiqararavi ena yalo galala ka vinaka qai savasava me solia na bula sautu kei na vakacegu ena dua na vuravura vaka lomalagi - ( Enhancing the Ministry in this 21st Century with Serenity that offers Peace, Calm and Heavenly Environment)

E yavutaki na i ulutaga qo ena nona vosa na Daunisame ena Same 24:3,4 kei na Maciu 5:8 'Sa kalougata ko ira sa yalosavasava ni ra na raica na Kalou'

​

Na Taro levu me da na taroga enai ka ruasagavulu ka ono (26th) ni yabaki qo -  Ena rawa li ni da vakasavasavataki keda kei na nodai lakolako?

E da sa bolei na Dauniveiqaravi ena noda raica vakavinaka tale mada na yavu eda sa mua tiko kina ni kua.

E levu nai tuvatuva sa davo oti me baleti keda ia au via laveta ni kua ni yavu vinaka duadua ni noda rawata na bula savasava ka na vakalomalagi tikoga kina noda vuravura se environment oya na noda sa segata vakamatua sara na lewe ni Tabacakacaka ko Navuloa me da cabe tiko kina ulunivanua ni Kalou. E cavuta tiko na Same 121 na vosa talei o ya - 'Au na tacake tikoga kina ulunivanua sa taka mai kina na noqui vukevuke'

​

Na gagadre ni tubu kina bula savasava sa cavuta tiko na Tui ko Tevita ni dau tacake tikoga kina ulunivanua; kei Eparama ni a ka ya vei Loti mai me noqu na ulunivanua ena Vakatekivu 19.

Ena sega ni na tubu me savasava na lotu ena veika vakaiyau se na levu ni tamata vuku, ena tubu ga ni da cabe wasoma kina ulunivanua I Jiova.

Sa na dredre sara ni na rawati na veiqaravi savasava ka yalovinaka ke sa yali vei keda na gadreva me da bulataka na bula savasava. Me da sa tu vata ka yalovata nida segata me yaco na veivakasavasavataki ena loma ni Lotu ena Tabacakacaka ko Navuloa. Dua tale me da laveta cake nai vakatagedegede ni noda veiqaravi o keda eda sa kacivi, me tekivu mai ena Siga Dina.

Eda sa na vakadruka kina na vakasama vaka Secularism kei na Post Modernism, ni laveta cake nai vakatagedegede ni noda veitalanoa ka da rai matua tikoga ki na ulunivanua.

​

Au sa nuitaka ni na veivakauqeti vei keda nai tukutuku lekaleka oqo.

MO NI KALOUGATA KA QAQA TIKO NA NODA I VAVAKOSO E NA KENA VAKANANUMI NI YABAKI RUASAGAVULU KA ONO (26th) EDAIDAI.

Vinaka saka vakalevu.